„Ef það væru fleiri eins og Gunni væri æska landsins í frábærum málum“

„Ef það væru fleiri eins og Gunni væri æska landsins í frábærum málum,“ segir Haraldur Dean Nelson, faðir og umboðsmaður Gunnars Nelson. Fyrr í dag sagði Margrét Júlía Rafnsdóttir hjá samtökunum Barnaheill Gunnar, sem bardagakappa, ekki vera góða fyrirmynd.

„Þetta er ekki sú fyrirmynd sem við viljum fyrir börnin okkar. Hann er auðvitað að nota einhverja tækni, ég þekki það ekki, en þetta er augljóslega ekki eitthvað sem börn eiga að leika eftir. Gott væri að finna eitthvað annað fyrir þau. Af nógu er að taka, af flottu fólki sem er að stunda eitthvað heilbrigðara,“ sagði Margrét fyrr í dag.

„Sleggjudómar eru aldrei gott veganesti“

Haraldur er afar ósáttur við þessi ummæli Margrétar.

„En ég vil byrja á því að hvetja fólk, sem hefur skoðanir á þessu, til þess að vaða ekki í Margréti sem persónu. Þessu á að svara málefnalega og ræða málin af skynsemi. Sleggjudómar eru aldrei gott veganesti,“ segir Haraldur og vindur sér svo í að svara ummælum Margrétar:

„Ummælin eru auðvitað samtökunum til vansa. Orðræðan á ekki að vera með þessum hætti. Mér finnst afar sérstakt að Barnaheill ætli að ákveða fyrir okkur foreldra hverjir eiga að vera fyrirmyndir barna okkar og hverjir ekki,“ segir Haraldur.

„Foreldrar ákveða sjálfir hvort börnin horfi“

Haraldur leggur áherslu á að foreldrar eigi að ákveða sjálfir hvað börn þeirra horfi á.

„Fyrst þarf fólk að ákveða hvort það ætli sjálft að horfa á þetta eða ekki. Síðan þurfa foreldrar að ákveða hvort þau leyfi börnum sínum að horfa á þessa íþrótt. Ef börnum er leyft að horfa á þetta, þá hljóta foreldrar að útskýra fyrir börnunum hvernig þetta fer fram,“ segir Haraldur.

Hann segir mikilvægt að setja hlutina í rétt samhengi.

„Börn eiga auðvitað ekki að stunda MMA [blandaðar bardagaíþróttir]. Alveg eins og börn eiga ekki að stökkva fram af háum skíðapalli eða keyra hraðskreiða kappakstursbíla. Það þarf að skoða þetta í réttu samhengi og útskýra þetta fyrir börnum.“

„Þrautþjálfaðir einstaklingar“

Miklu máli skiptir, að mati Haraldar, að í UFC keppi einstaklingar af frjálsum vilja eftir ströngum reglum.

„Þarna eru þrautþjálfaðir einstaklingar sem mætast og dómari sem sér um að vernda þá og getur stoppað bardagann hvenær sem er. Báðir einstaklingarnir geta líka hætt hvenær sem er, eins og gerðist á laugardaginn,“ útskýrir Haraldur.

„Þetta er ekki ofbeldi, ofbeldi er þegar einhver er neyddur til athafna sem hann vill ekki taka þátt í. Þetta er vissulega harðgerð íþrótt, en þetta er ekki ofbeldi,“ segir Haraldur.

Haraldur segir það hafa verið fyrirséð að svona ummæli myndu koma í umræðuna með auknum vinsældum Gunnars.

„Fyrst og fremst ættu ummæli af þessu tagi að valda samtökum eins og Barnaheilli áhyggjum en ekki Gunna. Við vissum að það myndu koma aðilar fram sem væru með þessar skoðanir og það er mikilvægt að svara þeim með rökum,“ útskýrir Haraldur.