Barcelona refsaði City á Etihad

Manchester City á erfitt verkefni fyrir höndum ætli liðið sér að komast áfram í fjórðungsúrslit Meistaradeildar Evrópu.

Liðið tapaði fyrir Barcelona á heimavelli, 2-0, og munaði mestu um að liðið missti varnarmanninn Martin Demichelis af velli með rautt spjald í upphafi síðari hálfleiks.

Demichelis braut þá á landa sínum frá Argentínu, Lionel Messi, sem var sloppinn í gegn. Vítaspyrna var umsvifalaust dæmd og Demichelis sendur í bað. Messi skoraði svo sjálfur úr spyrnunni.

City-menn héldu áfram að verjast eins og þeir höfðu gert allan leikinn. En á 90. mínútu brást vörnin eftir laglegt spil þeirra Dani Alves og Neymar á hægri kantinum. Alves komst í gott færi í vítateignum og skilaði knettinum í netið.

David Silva fékk besta færi City í seinni hálfleik en hann lét Victor Valdes verja frá sér í stöðunni 1-0. Lítið var um opin færi í fyrri hálfleik.

Síðari leikur liðanna fer fram í Barcelona en 16-liða úrslitin halda áfram annað kvöld.