Hazard var ekki í hóp þar sem hann missti af æfingu í vikunni

Eden Hazard, leikmaður Chelsea, horfði á leik Chelsea og Schalke í Meistaradeild Evrópu úr stúkunni í gær en José Mourinho, knattspyrnustjóri Chelsea, hafði Belgann ekki í hóp þar sem hann missti af æfingu á mánudaginn.

Hazard hafði fengið leyfi til að heimsækja sinn gamla klúbb Lille í Frakklandi þar sem hann var heiðursgestur á leik gegn Monaco.

Mourinho gerði sex breytingar á liði Chelsea eftir tapið gegn Newcastle um síðustu helgi en Chelsea vann Shalke 3-0 á Stamford Bridge í gær.

„Ég ætla ekki að segja ósatt, hann var ekki meiddur,“ sagði Mourinho í viðtali eftir leikinn í gær.

„Þetta er ungur strákur sem gerði mistök. Krakkar gera oft mistök en þá er það höndum feður þeirra að kenna þeim og láta þá læra af sínum mistökum. Hann vildi auðvitað spila og var mjög vonsvikinn en við unnum leikinn án hans.“

„Hann verður mættur aftur í hópinn á laugardaginn gegn WBA og málinu því lokið.“