Bayern ekki í vandræðum á Ítalíu

Bayern München komst örugglega áfram í undanúrslit Meistaradeildar Evrópu eftir 2-0 sigur á Juventus á Ítalíu í kvöld og 4-0 samanlagt.

Staðan að loknum fyrri hálfleik var markalaus en þeir þýsku voru með leikinn í höndunum og líklegri til að skora.

Bæði lið áttu svo skot í stöng í upphafi síðari hálfleiks en Bayern gerði endanlega út um rimmuna þegar að Mario Mandzukic kom liðinu yfir á 64. mínútu. Hann skallaði í netið af stuttu færi eftir að Gianluigi Buffon varði frá Javi Martinez.

Það var aðeins formsatriði fyrir Bayern að klára leikinn en Claudio Pizarro náði að bæta öðru marki við í blálokin, eftir góðan undirbúning Bastian Schweinsteiger.

Barcelona komst einnig áfram í kvöld og það verða því tvö þýsk lið og tvö spænsk í undanúrslitum Meistaradeildarinnar þetta árið.