Sergio Ramos: Real Madrid þarf mann eins og Busquets

Sergio Ramos, leikmaður Real Madrid og spænska landsliðsins í fótbolta, segir að ef Real Madrid ætti að reyna að plata einhvern leikmann Barcelona yfir á Santiago Bernabeu þá ætti það að vera Sergio Busquets.

Sergio Busquets er 24 ára miðjumaður sem er í vanmetnu hlutverki inn á milli hinna teknísku leikmanna Barca. Busquets er mjög klókur spilari sem hjálpar öðrum leikmönnum liðsins að njóta sín.

„Ég er hrifinn af mörgum leikmönnum Barcelona en sá sem við þurfum mest á að halda er Busquets," sagði Sergio Ramosvið Cadena COPE.

„Xabi Alonso er að spila of marga leiki hjá okkur og við þurfum að fá mann eins og Busquets. Það eru líka menn eins og [Andres] Iniesta og [Lionel] Messi en það væri bara ómögulegt fyrir mig að ímynda mér þá í búningi Real Madrid," sagði Sergio Ramos.

„Það fer annars vel á með mér og Barcelona-leikmönnunum í landsliðinu og ég kann vel við menn eins og Andres, Busquets og svo líka [Gerard] Pique. Það kemur kannski einhverjum á óvart að okkur Victor Valdes kemur mjög vel saman enda sjáum við heiminum í svipuðu ljósi," sagði Sergio Ramos.