Nadal sló út Federer

Rafael Nadal virðist óðum vera að finna sitt fyrra form eftir langverandi meiðsli. Hann vann í nótt góðan sigur á Roger Federer á móti í Bandaríkjunum.

Nadal vann í tveimur settum, 6-4 og 6-2, og var sigurinn sannfærandi eins og tölurnar bera með sér.

Nadal meiddist illa á hné um mitt síðasta ár og var frá í alls sjö mánuði. Hann þurfti aðeins einn og hálfan tíma til að klára Federer í nótt en með sigrinum tryggði hann sér sæti í undanúrslitum Indian Wells-mótsins.

„Ég spilaði frábærlega í fyrsta settinu," sagði Nadal. „Annað settið var skrýtið. Roger barðist ekki eins og venjulega en hann var líklega að glíma við eitthvað vandamál hjá sér."

„Fyrir tveimur vikum síðan var ég ekki viss um hvort ég gæti spilað á þessu móti en nú er ég kominn í undanúrslitin. Þetta hefur komið mér mjög á óvart."