Carvalho dreymir um að komast til Real Madrid

Ricardo Carvalho hefur biðlað til Real Madrid um að kaupa hann frá Chelsea. Portúgalski miðvörðurinn vill endilega komast aftur til Jose Mourinho sem kom með Carvalho með sér frá Porto til Chelsea árið 2004.

Hinn 32 ára gamli Carvalho er enn í stóru hlutverki hjá Chelsea en missti mikið af síðasta tímabili vegna meiðsla. Hann var stanslaust orðaður við Internazionale á meðan Mourinho var þar.

„Ef það væri einhver möguleiki á því að ég gæti komist til Real Madrid þá myndi ég stökkva strax af stað hvort sem ég þurfti að fara þangað syndandi eða hlaupandi," sagði Carvalho í viðtali hjá spænska blaðinu AS.

„Það væri algjör draumur að fá að spila fyrir Real Madrid sem ég tel vera besta félagið í heimi og er nú komið með besta þjálfarann í sögu fótboltans," sagði Carvalho.

„Ég upplifði frábæra tíma með Mourinho hjá bæði Porto og Chelsea og það væri magnað að fá tækifæri til að vinna Meistaradeildina með honum hjá Real Madrid," sagði Carvalho.