Pepe: Jose Mourinho er hreinskilinn og jarðbundinn maður

Pepe, miðvörður Real Madrid hefur enn á ný látið ánægju sína í ljós með að spila fyrir landa sinn Jose Mourinho en Portúgalinn segir „Hinn sérstaka" krefjast vinnusemi í bæði leikjum og á æfingum.

„Ég elska að spila fyrir Mourinho. Hann er hreinskilinn og heldur sig við það sem hann er góður í. Hann er mjög gáfaður og setur mikla ábyrgð á okkur leikmennina," sagði Pepe í viðtali við heimasíðu Real Madrid.

„Mourinho er mjög jarðbundinn í kringum okkur og leggur áherslu á það að leikmenn séu vinnusamir og að þeir passi upp á hvern annan. Hann talar alltaf hreint út en stundum þolir fólk ekki að heyra sannleikann. Það sem hann segir er samt best fyrir okkur sjálfa sem og fyrir liðið," sagði Pepe.

„Við erum með fullt hús og hreint mark í Meistaradeildinni og höfum einnig byrjað vel í deildinni. Við erum í góðum gír og ég hef góða tilfinningu fyrir þessu tímabili," sagði Pepe.