Ferdinand verður í byrjunarliðinu

Sir Alex Ferguson knattspyrnustjóri Manchester United hefur staðfest að Rio Ferdinand verði í hjarta varnarinnar annað kvöld þegar liðið sækir Porto heim í Meistaradeildinni.

Manchester United má illa við að fá á sig mörk í leiknum eftir 2-2 jafntefli á heimavelli í fyrri leiknum og vonast United-menn til að Ferdinand geti hjálpað við að stoppa upp í þau göt sem hafa verið á vörn Evrópumeistaranna undanfarið.

"Rio er klár og verður í byrjunarliðinu á morgun," sagði Ferguson á blaðamannafundi í Portúgal í dag. "Okkur munar mikið um að hafa hann í liðinu," sagði stjórinn.

Darren Fletcher verður ekki í leikmannahópi United annað kvöld vegna meiðsla á læri sem hann hlaut í fyrri leik liðanna.