Walcott ætlar að ná leiknum gegn Roma

Theo Walcott segist miða við að ná leik Arsenal gegn Roma í 16-liða úrslitum Meistaradeildar Evrópu.

Liðin mætast á heimavelli Arsenal eftir tvær vikur og svo aftur í Róm þann 11. mars. Walcott hefur verið frá síðan hann meiddist á öxl í leik með enska landsliðinu í nóvember og þurfti síðar að gangast undir aðgerð vegna þessa.

„Það er stutt í mig og vonandi verð ég kominn aftur á fullt í lok mánaðarins," sagði Walcott á heimasíðu Arsenal. „Ég hef verið að leggja mikið á mig í endurhæfingunni varðandi öxlina. Ég verð þó að passa mig að ég verði 100 prósent klár þegar ég byrja aftur því ekki vil ég lenda aftur í þessum aðstæðum."