Benitez vill sækja í kvöld

Rafa Benitez segir sína menn í Liverpool ekki ætla að liggja í vörn í kvöld þegar þeir sækja Inter heim í Mílanó. Þetta er síðari leikur liðanna í 16-liða úrslitum Meistaradeildarinnar.

Liverpool vann fyrri leikinn 2-0 og getur með hagstæðum úrslitum í kvöld orðið fjórða enska liðið til að tryggja sig í 8-liða úrslitin.

"Það þýðir ekkert að mæta sterku liði eins og Inter og liggja bara í vörn. Við munum leitast við að sækja - og skora á þá úr skyndisóknum," sagði Benitez.

Leikurinn er sýndur beint á Sýn í kvöld klukkan 19:30.