Lækning við kvefi á næsta leiti

Breskir vísindamenn eru nú vongóðir um að fundist geti lækning við kvefi. Þeim tókst nýlega að smita erfðabreytta mús með kvefi þannig að auðveldara verður í framtíðinni að prófa ný kvefmeðul.

Kvef er sjúkdómur sem aðeins herjar á menn og simpansa. Því þykja það tímamót að það tókst að smita músina með kvefi. Það voru vísindamenn við Imperial háskólann í London sem tókst að búa til hina erfðabreyttu mús.

Prófessorinn Sebastian Johnston stjórnaði þessu verki og hann segir að auk kvefrannsókna muni erfðabreyttar mýs einnig gangast vel í rannsóknum á nýjum lyfjum gegn öðrum öndunarfærasjúkdómum eins og asma.

Það var breska heilbrigðisráðuneytið sem fjármagnaði tilraunir vísindamannanna og þar á bæ eru menn að vonum ánægðir með árangurinn enda talið að hann geti leitt til tímamóta í rannsóknum á öðrum sjúkdómum og kvillum.

Vírusinn sem veldur kvefi var uppgvötvaður fyrir 50 árum en það hefur ætíð verið erfiðleikum bundið að rannsaka hann þar sem tilraunadýr hafa ekki legið á lausu. Að vísu var notast við sjálfboðaliða við slíkar rannsóknir á síðustu öld en þeim var hætt árið 1989 þar sem árangur af þeim var nær enginn. Nú þegar hægt er að smita mýs er sá hjalli að baki.