Inter náði í þrjú stig til Moskvu

Inter gerði góða ferð til Moskvu og vann CSKA 2-1 á útivelli í G-riðli Meistaradeildarinnar. Varnarmaðurinn Walter Samuel skoraði sigurmarkið í leiknum þegar tíu mínútur voru til leiksloka, eftir hræðileg mistök hjá markverði heimamanna.

CSKA Moskva komst yfir í leiknum á 32. mínútu þegar hinn brasilíski Jo skoraði laglegt mark. Þetta var eina mark fyrri hálfleiks. Þegar sjö mínútur voru liðnar af seinni hálfleik jafnaði Inter en þar var markahrókurinn Hernan Crespo á ferðinni eftir slæm varnarmistök.

Samuel skoraði síðan með skalla sem virtist hættulaus en markvörður CSKA misreiknaði knöttinn hrikalega.

Inter er nú með sex stig eftir tvo leiki en CSKA Moskva er á botni riðilsins með eitt stig.