Morgnarnir erfiðastir

Erfiðast er að gera margt í einu á morgnana og kvöldin. Vísindamenn finna sér mismunandi viðfangsefni og sum þeirra koma spánskt fyrir sjónir. Vísindamaðurinn Daniel Bratzke starfar við háskólann í Tübingen í Þýskalandi. Hann hefur síðustu ár rannsakað viðbragðstíma fólks á mismunandi tímum sólarhringsins.

Nú var komið að því að rannsaka hæfni fólks til að sinna mörgum verkum í einu og hvaða áhrif klukkan hefði á hana. Niðurstöðurnar koma ekki á óvart. Erfiðast er að sinna mörgum verkum í einu snemma á morgnana og seint á kvöldin. Hverjum hefði dottið það í hug?

Nú eru í það minnsta til vísindaleg gögn sem styðja þá kröfu að enginn ætti að þurfa að vakna of snemma eða vaka of lengi.