Shevchenko: Kaka er sá besti

Andriy Shevchenko, leikmaður Chelsea, segir að fyrrum félagi hans hjá AC Milan, Brasilíumaðurinn Kaka, sé besti knattspyrnumaður heimsins í dag. Kaka fór á kostum með Milan gegn Manchester United í Meistaradeildinni í vikunni og skoraði tvö mörk á Old Trafford.

"Kaka er besti leikmaður heimsins í dag. Hann á skilið að fá gullknöttinn og ég er viss um að hann fær hann fljótlega. Ef ekki núna, þá í náinni framtíð. Milan spilaði frábæra knattspyrnu á Old Trafford og meiðsli þeirra Maldini og Gattuso settu strik í reikninginn hjá liðinu. Mér finnst liðið hafa spilað betur í Meistaradeildinni en á Ítalíu og ég er viss um að liðið hefur það sem til þarf til að komast í úrslitin," sagði Shevchenko.