Hitzfeld: Milan tók okkur í kennslustund

Ottmar Hitzfeld, þjálfari Bayern Munchen, viðurkenndi að AC Milan hefði einfaldlega verið betri aðilinn í leik liðanna í Meistaradeildinni í kvöld. Milan sigraði 2-0 í Munchen og mætir Manchester United í undanúrslitum.

"Við gátum ekki sýnt sama gæðaleik og Milan í kvöld. Þeir eru eitt besta lið í heimi og sýndu það í kvöld. Okkur skorti bara smá heppni í þessum leik," sagði þjálfarinn.

Markaskorarinn Clarence Seedorf hjá Milan hrósaði varnarleik sinna manna. "Vörnin var frábær og náði að halda aftur af Bayern þó þeir fengju nokkur ákjósanleg færi snemma leiks," sagði Hollendingurinn sterki.