Keisarinn er ekki bjartsýnn

Franz Beckenbauer, forseti Bayern Munchen, er ekki bjartsýnn á að liðið nái góðum árangri í Meistaradeild Evrópu í vetur. Félagið hefur misst bæði Michael Ballack og Ze Roberto en fengið Mark van Bommel, Lukas Podolski og Daniel van Buyten til liðsins í þeirra stað.

Beckenbauer er samt ekki bjartsýnn. "Við erum ekki með sterkara lið núna en á síðustu leiktíð. Á síðustu leiktíð var kannski of mikil pressa á liðinu en núna erum við að reyna að minnka væntingarnar til liðsins," sagði Beckenbauer og lagði þar með sitt lóð á vogarskálarnar í þeim efnum.

Bayern mætir Spartak Moscow í fyrsta leik sínum í Meistaradeild Evrópu og Beckenbauer segir það vera grundvallaratriði að vinna þann leik. - dsd