43 féllu í Írak

Alls féllu 43 fyrir hendi íraskra andspyrnumanna í gær. Af hinum föllnu voru flestir lögreglumenn. Árásirnar voru gerðar aðeins degi eftir að stærsti stjórnmálaflokkur súnní-múslima ákvað að bjóða ekki fram í kosningunum í janúar vegna stigvaxandi ofbeldis. Tólf lögreglumenn dóu þegar sprengjuárás var gerð á lögreglustöð í borginni Tígrit og sprengja í vegkanti felldi fimm þjóðvarðliða í borginni Baqouba skammt frá Bagdad. Þá létust fimm óbreyttir borgarar þegar bílsprengja sprakk í borginni Mosul auk þess sem tveir aðrir lögreglumenn voru ráðnir af lífi.