Saddam vildi hefja framleiðlsu

Eins og hálfs árs leit Bandaríkjamanna að gereyðingarvopnum í Írak hefur engan árangur borið, hins vegar hafa fundist vísbendingar um að Saddam Hussein hafi haldið í vonina um að hefja á ný þróun og framleiðslu slíkra vopna þegar fram liðu stundir. Þetta eru sagðar niðurstöður bandarísku vopnaeftirlitssveitanna sem hafa starfað í Írak frá því fljótlega eftir innrásina í mars í fyrra. Í 1.500 blaðsíðna skýrslu Charles Duelfer, yfirmanns vopnaeftirlitsmanna, sem hefur ekki enn verið birt opinberlega kemur fram að Írakar hafi flutt inn ólögleg efni sem mátti nota til að framleiða gereyðingarvopn. Að auki hafi Írakar verið að þróa ómönnuð flugför þrátt fyrir bann Sameinuðu þjóðanna og viðhaldið iðnfyrirtækjum sem gætu tekið til við framleiðslu gereyðingarvopna. Duelfer tók við stjórn vopnaeftirlitsins af David Kay sem sagði í áfangaskýrslu: "Við höfðum nær öll rangt fyrir okkur," um gereyðingarvopn og áætlanir Íraka.