Torg ehf. kaupir Fróða

Torg ehf., fyrirtæki í eigu Prentsmiðjunnar Odda hf., hefur keypt öll hlutabréf í útgáfufyrirtækinu Fróða hf. og mun taka við rekstri Fróða hf. frá og með deginum í dag. Í fréttatilkynningu frá Fróða segir að Fróði hf. og forveri hans, Frjálst framtak hf., hafi verið umfangsmesti tímaritaútgefandi landsins í á þriðja áratug. Fyrirtækið gefur nú út tvö vikublöð, Vikuna og Séð og heyrt, og að auki tímaritin bOGb, Gestgjafann, Hús og híbýli, Mannlíf og Nýtt Líf sem koma út mánaðarlega. Heildartölublaðafjöldi á ári er um 170.   Í tilkynningu Fróða segir að aðaleigandi Fróða hf., Magnús Hreggviðsson, hafi ákveðið að draga sig út úr útgáfurekstri. Þá segir að í nokkra mánuði hafi staðið yfir viðræður við stórt erlent útgáfufyrirtæki um kaup á Fróða hf. og hafi þeir samninga verið að nálgast lokastig. Þá segir að vegna mikilla samskipta og viðskipta fyrirtækjanna Fróða hf. og Prentsmiðjunnar Odda hafi orðið úr að Oddi hf. gengi inn í þau samningsdrög sem fyrir lágu og keypti Fróða hf. Ekki eru áformaðar breytingar á útgáfustarfsemi Fróða hf. né heldur miklar breytingar á starfsmannahaldi, en hjá Fróða hf. starfa nú um 80 manns í föstum störfum. Fyrst um sinn mun Knútur Signarsson sem starfað hefur um langt árabil sem framkvæmdastjóri hjá Prentsmiðjunni Odda sjá um framkvæmdastjórn hjá Fróða hf. Hægt er að horfa á frétt Stöðvar 2 um málið með því að smella á hlekkinn hér að neðan.