Í 14. sæti yfir efnahagsfrjálsræði

Ísland er í fjórtánda sæti yfir þau lönd þar sem frjálsræði í efnahagsmálum er mest. Sætinu deilum við með Dönum. Ísland fær einkunnina 7,6 í nýrri skýrslu kanadísku stofnunarinnar Frazer sem birtir árlega skýrslu um frjálsræði í efnahagsmálum. Íslenski hluti skýrslunnar er unninn í samvinnu við Hagfræðistofnun Háskóla Íslands. Ísland fellur um sæti og lækkar í einkunn frá árinu 2001. Breytingin er óveruleg. Tryggvi Þór Herbertsson segir hana skýrast af breytingu á gengi dollars og tæknilegra breytinga á útreikningi auk hækkunar ríkisútgjalda. Einkavæðing viðskiptabankanna er meðal þess sem kemur í veg fyrir frekari lækkun Íslands á listanum. Ísland hefur hækkað um þrjú sæti frá 1995 og segir Tryggvi þá breytingu marktæka. Hong Kong trónir á toppi listans með 8,7 í einkunn. Af Norðurlöndunum eru Norðmenn neðstir eða í 36. sæti en Svíar eru í 22. sæti. Af Norðurlöndunum er mest frjálsræði í efnahagsmálum í Finnlandi sem er í 11. sæti með einkunnina 7,7. Tryggvi Þór segir töluverða reynslu komna á þessar rannsóknir. Sterk fylgni sé milli stöðunnar á þessum lista og hagsældar í viðkomandi löndum. "Aukið atvinnufrelsi leiðir af sér aukna fjárfestingu, aukinn hagvöxt og í framhaldi af því bætt lífskjör," segir Tryggvi. Rannsóknir hagfræðinga benda til þess að frjálsræði í efnahagsmálum auki velmegun á tvo vegu. Annars vegar með því að leysa úr læðingi kraft og hugvit einstaklinga. Hins vegar með því að auka fjárfestingu. Skýrslan sýnir að í þeim löndum sem búa við mest frjálsræði var hagvöxtur 3,4 prósent að meðaltali árin 1980 til 2000 samanborið við 1,7 prósent hjá löndum fyrir miðju listans og 0,4 prósent hjá þeim neðstu. Erlend fjárfesting er mun meiri hjá löndum sem búa við frjálsræði og landsframleiðsla á mann mun hærri. Meðallandsframleiðsla á mann í efstu ríkjunum var 26.100 dollara eða rúmar 1,8 milljónir króna meðan landsframleiðsla á mann í þeim fátækustu var um 200 þúsund krónur.