Breyting húsbréfa skattskyld

Skuldabréfaskipti milli gamla húsbréfakerfisins og þess nýja eru túlkuð sem sala og kaup, en ekki sem formbreyting. Niðurstaða ríkisskattstjóra er sú að fjármagnstekjustofn myndist af hagnaði innleystra húsbréfa við skiptin. Ríkið fær því talsvert í sinn hlut í formi fjármagnstekjuskatts við kerfisbreytinguna. Erindi um skattalega meðferð skuldabréfaskiptanna var sent ríkisskattstjóra 22. júní, rúmri viku áður en kerfisbreytingin tók gildi og svar barst þremur dögum síðar. Hallur Magnússon, sviðsstjóri þjónustu og almannatengsla, segir túlkun skattstjóra hafa komið í bakið á mönnum. "Þessi túlkun bitnar á þeim sem síst skyldi," segir Hallur. Sá hópur sem harðast gæti orðið úti eru eigendur húsbréfa sem hafa tekjutengdar bætur. Fjármagnstekjur af bréfunum koma, miðað við túlkunina, í einu lagi á þetta skattaár. Hallur segir að túlkun sjóðsins hafi verið þá að ekki væri um innlausn að ræða heldur skipti á bréfum og þar með ætti ekki að greiða skatt fyrr en við innlausn þeirra bréfa. Við kerfisbreytinguna stóð ekki öllum eigendum húsbréfa til boða að skipta bréfum. Sigurður Geirsson, sviðsstjóri fjárstýringarsviðs Íbúðalánasjóðs, segir sjóðinn hafa gengið eins langt í skiptunum og hægt hafi verið. "Við gengum eins langt og við töldum stætt á að gera án þess að stofna sjóðnum í hættu." Íbúðalánasjóður hefur heimild til þess að draga út húsbréf og innleysa þau. Við kerfisbreytinguna aukast líkur á því að bréf þeirra sem eftir eru verði dregin út. Þar með breytast áhættuforsendur eigenda bréfanna. Efasemdir eru um réttmæti þess að breyta áhættuforsendum við útdrátt. Sigurður segir ótvírætt að mati sjóðsins að heimildin sé fyrir hendi. Líkur á útdrætti í gamla kerfinu hafi ekki verið fasti og sjóðurinn hafi þessar heimildir. Sigurður segir að gagnrýnisverð atriði á kerfisbreytinguna séu minniháttar miðað við umfang hennar. Stuttur tími hafi verið fyrir kerfisbreytinguna. Lengri tími hefði aukið á óvissu á markaði. Hann segir að þegar breytingin sé skoðuð í heild hafi tekist vel til. "Þessi breyting er íbúðakaupendum framtíðarinnar til mikilla hagsbóta."