Loksins vann Allen í fram­lengingu

Bills tapaði boltanum í fyrstu sókn framlengingar og Rams gat því tryggt sigurinn með vallarmarki. Liðið komst í gott færi en leikmaður Bills varði sparkið til að gefa sínum mönnum annað tækifæri.

Það nýtti leikstjórnandi Bills, Josh Allen, sér vel. Kom liðinu á frábæran stað með því að hlaupa yfir Hrútana.

Svo steig sparkarinn Tyler Bass fram og kláraði leikinn fyrir Bills. Magnaður leikur og það sem er enn magnaðra er að Josh Allen var að vinna í framlengingu í fyrsta skipti. Hann hafði tapað sjö framlengdum leikjum á ferlinum. Hann var því að brjóta stóran, sálfræðimúr.

Þessi leikur og allir hinir verða gerðir upp í Lokasókninni á Sýn Sport klukkan 21.45 í kvöld.