KA með sann­færandi sigur á Eyja­mönnum

Fyrri hálfleikur leiksins var gríðarlega jafn og munaði aldrei meira en þrem mörkum á liðunum. Í hálfleik var KA með tveggja marka forystu, 13-11, og ljóst að leikurinn var enn galopinn.

KA gekk vel að skora í seinni hálfleik og náði liðið hægt og rólega að byggja upp forskot á gestina. Um miðjan seinni hálfleikinn var vörn KA í fantaformi þar sem ÍBV náði ekki að skora í fimm mínútur í röð. Þar náði Ágúst Elí Björgvinsson að verja vel í marki KA en hann stóð sig vel í leiknum.

Eftir markalausa kaflann féll sjálfstraust Eyjamanna og gat KA viðhaldið góðu forskoti og endaði leikurinn á sex marka sigri KA 31-25.

Dagur Árni Heimisson var markahæsti leikmaður leiksins en hann skoraði 11 mörk fyrir KA. Vörn KA stóð sig vel þar sem Ágúst Elí varði 20 skot og var með 44 prósent markvörslu. Jens Bragi Bergþórsson sinnti varnarvinnunni vel fyrir KA og skoraði einnig fimm mörk frá línunni.

Kristófer Ísak Bárðarson var markahæstur í liði ÍBV en Gary Emanuel Philips var ekki langt frá honum.

KA er nú í efsta sæti Olís-deildar karla með jafn mörg stig og Haukar en Haukar eru búnir að spila einum leik minna og geta því endurheimt toppsæti deildarinnar af KA.