Lét á­kærða vita af andlátinu: „Hann var í miklu upp­námi“

Aðalmeðferð í málinu hófst á þriðjudag og hélt vitnaleiðsla áfram í dag. Ntentes hefur þegar gefið skýrslu fyrir dómi auk þess sem hann hefur sætt gæsluvarðahaldi frá því í desember 2025.

Sjá nánar: Manndráp á Skjólbraut í Kópavogi

Vinkona Ntentes og Zingara gaf vitni fyrir dómi þar sem fyrrverandi kærasti hennar var vinur þeirra beggja. Kærastinn og Zingara hafi verið æskuvinir en síðan flosnað upp úr vinskapnum.

„Ég veit ekki hvort það hafi eitthvað komið upp á en þetta var ástæðan fyrir því að það flosnaði upp úr vinskapnum, það var ekki að ganga þetta viðskiptasamband,“ sagði hún.

Hún bætti því við að fyrrverandi kærastinn hefði skuldað Zingara sjálfum milljónir króna og öðrum „hættulegri mönnum“. Zingara hafði haft samband við hana og greint frá skuldinni ásamt fíkniefnaneyslu þáverandi kærasta hennar og varð það til þess að sambandinu lauk. 

Fyrrverandi kærastinn hafi síðan látið vitnið vita af andláti Zingara og dögum síðar, þann 2. desember, hafi hún fundið sig kvadda til þess að láta Ntentes vita af andlátinu þar sem Zingara og Ntentes hefðu verið góðir vinir. Hún hringdi í Ntentes sem hafi við upphaf símtalsins verið „mjög venjulegur“.

„Svo segi ég honum að Eddie hafi dáið og hann var í miklu uppnámi,“ sagði vitnið.

Lögreglumaðurinn sem sótti Ntentes á heimili hans gaf einnig skýrslu en þá var hann grunaður um fíkniefnamisferli en ekki manndráp. Ntentes hafi verið mjög rólegur og komið með þeim upp á lögreglustöð.

Lögreglan keypti nýja skó

Skór Ntentes hafa verið töluvert til umræðu við aðalmeðferðina. Tvenns konar skóför fundust á vettvangi með blóði á og sást Ntentes klæðast tveimur mismunandi skópörum á eftirlitsmyndavélum umrætt kvöld, þann 28. nóvember 2025.

Annað skóparið, svartir Adidas-skór, var handlagt á heimili hans og taldi rannsóknarlögreglumaðurinn mynstur skófars skóparsins vera með mjög svipuðum hætti og skófarið sem fannst á vettvangi. 

Hins vegar fannst aldrei hitt skóparið, hvítir Nike-skór. Við skýrslutöku í gær sagði einn lögreglumannanna að Ntentes hefði verið misvísandi um hvað varð um skóna. Vegna þessa festi lögreglan kaup á skópari sem hún taldi vera sömu skór og ákærði klæddist.

„Það eru veruleg líkindi með stærð og mynstri,“ sagði lögreglumaðurinn en játaði því að skóstærðin væri ef til vill ekki nákvæmlega rétt.

Leiða má til lykta að svo mikil áhersla sé lögð á skópörin svo hægt sé að ráða úr hvort að Ntentes hafi í raun verið viðstaddur umrætt kvöld. Blóð fannst á sólum skónna.

Ntentes sjálfur sagði að hann hefði farið einungis einu sinni á heimili Zingara þetta kvöld. Saman hafi þeir neytt kókaíns.

Lyfjafræðingur staðfesti við dóm skýrslu sína sem leiddi í ljós að Zingara hafi neytt kókaíns fyrir andlát sitt.