Nú er hægt að taka Strætó alla leið að flug­stöðinni

Í tilkynningu þess efnis á vef Stjórnarráðs Íslands segir að mikilvægar umbætur hafi verið gerðar á aðkomu og aðstöðu fyrir almenningsvagna sem aka til og frá Keflavíkurflugvelli til að bæta aðgengi flugfarþega og starfsfólks að flugstöðinni.

Breytingarnar taki til leiðar 55, sem aki milli BSÍ og/eða Fjarðar til Keflavíkurflugvallar, og leiðar 89 sem ekur milli Reykjanesbæjar/Suðurnesjabæjar og Keflavíkurflugvallar. Nýtt fyrirkomulag taki gildi á morgun, fimmtudaginn 1. október.

Verkefnið hafi verið unnið í náinni samvinnu Vegagerðarinnar, sem sjái um rekstur landsbyggðarstrætó, Isavia og Almenningssamganga höfuðborgarsvæðisins ohf. Breytingarnar séu í takt við tillögur starfshóps, sem skipaður hafi verið um almenningssamgöngur milli höfuðborgarsvæðis og Keflavíkurflugvallar.

„Þetta er mikilvægur áfangi við að bæta almenningssamgöngur til Keflavíkurflugvallar. Við viljum að farþegar og starfsfólki eigi auðveldara með að velja sér ferðamáta til og frá flugvellinum. Nýjar stoppistöðvar og yfirbyggðir göngustígar gera þar gæfumuninn. Næstu skref okkar verða að skapa forsendur til auka tíðni og bæta þjónustu almenningsvagna á þessari leið,“ er haft eftir Eyjólfi Ármannssyni innviðaráðherra.

Helstu breytingar á leið 55:

• Ný stoppistöð fyrir brottfararfarþega (KEF Brottfarir). Ný stöð tekin í notkun brottfararmegin við flugstöðina fyrir farþega á leið í flug. Leið 55 ekur alla leið inn að flugstöðinni og hleypir út farþegum á sama stað og flugrútur. Ekki verður hægt að stíga um borð í almenningsvagna á þessari stöð.
• Ný stoppistöð fyrir komufarþega (KEF Komur). Ný stöð tekin í notkun komumegin á sérmerktu stæði. Byggt hefur verið yfir gönguleiðina frá flugstöðinni til að skýla farþegum sem eru að koma úr flugi fyrir veðri og vindum.
• Bættar merkingar. Allar merkingar inni í flugstöðinni og utan dyra á stoppistöðvum og gönguleiðum hafa verið bættar og endurgerðar.
• Auðveldara að flytja hjól. Hægt er að taka með reiðhjól um borð á nokkrum algengum brottfarartímum hjá leið 55 (fimm brottfarartímar af tólf).
• Endastöð. Á virkum dögum keyrir leið 55 ýmist alla leið til Reykjavíkur (BSÍ) eða til Hafnarfjarðar (Fjörður). Í Firði er hægt að skipta yfir í leið 1 sem ekur síðan í gegnum Garðabæ, Kópavog og inn í miðbæ Reykjavíkur. Um helgar er endastöðin Fjörður.
• Greiðslur. Hægt er að greiða bæði með reiðufé eða snertilausum greiðslukortum.
• Sérstök kjör. Hægt er að kaupa áskriftarkort í landsbyggðarstrætó (t.d. leið 55 og 89).

Að öðru leyti verði farþegar ekki varir við breytingar á leið 55 og allar tímasetningar á akstursleiðinni séu óbreyttar. Ný heiti á stoppistöðvum muni birtast jafnt og þétt á merkingum og í upplýsingakerfum.

Hér að neðan má sjá kort sem sýnir staðsetningar stoppistöðvanna:

Loks segir að akstursleið og tímatafla leiðar 89, sem gangi frá Reykjanesbæ og Suðurnesjabæ til flugvallarins, sé óbreytt. Stoppistöðin sem leið 89 stoppar við fái nýtt nafn, Kjóavellir. Stöðin hafi áður heitið KEF-Airport áður. Stæði fyrir leið 89 verði áfram á sama stað og áður en til standi að bæta þá aðstöðu.