Daði segir eyðsluseggjum að hemja sig

Daði Már Kristófersson, fjármálaráðherra, mælti í morgun fyrir fjárlagafrumvarpi ríkisstjórnarinnar. Gert er ráð fyrir að fimm milljarða króna afgangur verði á rekstri ríkissjóðs á næsta ári og Daði sagði að halda þyrfti rétt á spöðunum til þess að það gangi eftir. 

„Halda þarf fast í taumana. Reynslan segir okkur að taumhaldið hefur nær alla tíð gengið erfiðlega og hér verður að gera bragarbót. Allir ráðherrar og forstöðumenn ríkisstofnana bera ábyrgð á því að halda fjárútlátum innan heimilda og þá ábyrgð verða þeir að taka alvarlega,“ sagði Daði.

Fjármálaráðuneytið vinni nú að því að auka verulega við miðlægt eftirlit með útgjöldum. 

„Ég vil fá að segja hér að í langsamlega flestum tilfellum og fyrir langsamlega flestar ríkisstofnanir er agi í rekstrinum. En það eru ákveðin vandamál og á þeim þurfum við að taka.“

Stjórnarandstaðan hefur látið til sín taka í umræðum um fjárlög og sagði Karl Gauti Hjaltason, þingmaður Miðflokksins, ekki hægt að fara inn í veturinn með bjartsýnina eina að vopni. Samkvæmt fjárlagafrumvarpi á að ná fram þriggja milljarða króna aðhaldi með fækkun stöðugilda hjá ríkinu og Karl Gauti gagnrýndi að ekki væri ráðist í frekari uppsagnir. Aðeins væri gert ráð fyrir að fækka störfum um tvö hundruð.

„Ríkisstarfsmönnum hefur fjölgað síðustu ár um mörg hundruð á hverju einasta ári, í fjölda mörg ár. Þetta er hænuskref að mínu mati. Ríkisstjórninni er ekki alvara með að spara,“ sagði Karl Gauti.

Ingibjörg Isaksen, þingmaður Framsóknar sagðist óttast að 5,2 prósenta almenn hækkun á krónutölugjöldum verði fordæmi fyrir gjaldskrárhækkanir sveitarfélaga og Guðlaugur Þór Þórðarson, þingmaður Sjálfstæðisflokksins, sagði þær geta ýtt undir verðbólgu.

„Telur hæstvirtur ráðherra að leiðin til þess að efla hagvöxt sé að fara í þessar gríðarlega miklu skattahækka nir sem þessi ríkisstjórn hefur farið í? Hvar hefur það virkað að ná fram auknum hagvexti með því að stórhækka skatta á fyrirtæki og fólk?“