Full­komin frum­raun Ídu sem sló í gegn með þrennu

Hammarby valtaði yfir Gamla Uppsala í sænska bikarnum í gær, 5-0, og getur að mestu þakkað Ídu fyrir það hvernig fór.

Eftir að hafa setið á varamannabekknum í þeim tveimur leikjum sem Hammarby hafði spilað frá komu hennar frá FH í sænsku deildinni fékk Ída tækifærið í byrjunarliðinu í gær og gaf þjálfara sínum eitthvað til að hugsa um.

Hún kom Hammarby yfir með fyrsta marki leiksins á 20. mínútu og var aftur á ferðinni skömmu fyrir lok fyrri hálfleiks er hún kom Hammarby í stöðuna 3-0.

Snemma í seinni hálfleik fullkomnaði hún svo þrennu sína og að lokum hafði Hammarby betur, 5-0.

Frábær frumraun hjá leikmanninum öfluga sem hefur án efa sýnt sig fyrir þjálfara liðsins.

Hammarby er eitt af toppliðum Svíþjóðar og er nú í harðri toppbaráttu við Hacken í sænsku úrvalsdeildinni. Aðeins tvö stig skilja liðin að þegar 17 umferðir hafa verið leiknar. Guðrún Arnardóttir spilar einnig með Hammarby og í Hacken er að finna Thelmu Karen Pálmadóttur.

Þrennur Ídu síðan í gær má sjá í spilaranum hér ofar í fréttinni.