Tvö út­köll á svipuðum slóðum á há­lendinu með stuttu milli­bili

Þetta staðfesti Jón Þór Víglundsson upplýsingafulltrúi Landsbjargar í samtali við blaðamann Vísis en hann sagði fyrra útkallið hafa borist um hádegisbil.

„Þetta er annað útkallið í dag á svipaðar slóðir. Það byrjaði upp úr hádeginu með útkalli á Fimmvörðuháls,“ segir hann en þar hafði göngumaður slasast á fæti svo að hann treysti sér ekki til þess að halda áfram göngu sinni. Sá var sóttur upp í Fimmvörðuskála.

Fjöldi fólks kallaður út

Þá var búið að kalla út björgunarsveitir bæði frá Hvolsvelli og niður á Eyrarbakka.

„Það mál leystist farsællega, hann var sóttur upp í Fimmvörðuskála, sem er ansi hátt,“ segir Jón og bætir við „þegar björgunarsveitir voru á niðurleið með hann þá kom seinna útkallið.“

Þá hafi verið kallað aftur út og víðar en í fyrra skipti, björgunarsveitarfólk sem hafi komið að verkinu hafi hraðað sér „alveg frá Kirkjubæjarklaustri og vestur yfir að inn á Árborgarsvæðið“ en Eyrbekkingarnir hafi einnig verið á svæðinu.

Einnig var óskað eftir aðstoð fjallabjörgunarmanna frá Vestmannaeyjum en þeir voru sóttir af björgunarskipinu Þór sem fór með þá upp í Landeyjahöfn og þar hafi þeir svo verið sóttir af félögum sínum uppi á landi.

Jón segir miklu hafa munað um blíðviðrið í dag, það hafi gert þeim miklu auðveldara fyrir að hífa manninn, sem hafi slasast illa á erfiðum stað á austanverðum Sólheimajökli, upp í þyrlu Landhelgisgæslunnar sem gat ekki lent.

„Þetta var talsvert víðtækt útkall, enda vitað að þetta væri á erfiðum stað en ég veit ekki hversu margir voru komnir á svæðið,“ segir hann en Ásgeir Erlendsson hjá Landhelgisgæslunni staðfesti einnig að óskað hafi verið eftir aðstoð þyrlunnar um klukkan tvö í dag.

Nauðsynlegt að hífa hann upp

Það hafi sem fyrr segir verið þörf á þyrlu vegna staðsetningarinnar og það hafi verið augljóst að það yrði mjög erfitt að koma honum af staðnum öðruvísi en með þyrlu.

„Þess vegna var þyrlusveitin kölluð út sem hérna hífði manninn um borð í þyrluna og flutti hann síðan á slysadeild,“ staðfesti Ásgeir í samtali við blaðamann.

Jón Þór útskýrði einnig að manninum hefði verið komið fyrir í svokallaðri grjónadýnu og hann búinn undir flutninginn. Aðgerðirnar hafi gengið mjög vel þrátt fyrir erfiða staðsetningu en hann telur manninn sem slasaðist á jöklinum hafa verið fótbrotinn eða í það minnsta illa brákaðan.

„Ég er ekki alveg klár á því hvar þetta er nákvæmlega, þetta er við jökulsporðinn austanverðan en svona tiltölulega framarlega á honum.“