Þrengja Reykjaveg og loka tveimur götum við Laugar­nes­skóla

Tillagan var samþykkt á fundi umhverfis- og skipulagsráðs í vikunni. Guðný María Jóhannsdóttir formaður ráðsins segir breytinguna til þess að tryggja öryggi bæði gangandi og hjólandi. 

„Þetta er verkefni sem er að fara í gang, nákvæm tímaáætlun liggur ekki fyrir en þetta er í startholunum og er auðvitað hið besta mál,“ segir Guðný María í samtali við fréttastofu.

„Með skólaþorpinu er verið að bregðast við stöðunni í skólamálum í hverfinu og þetta er partur af því sem þarf að gera. Það er verið að búa til botnlanga á tveimur stöðum og stoppa gegnumumferð sem hefur verið. Svo á að þrengja aðra göngubrautina og búa til miðeyju á hina og hækka hana og reyna að hægja á umferðinni þannig,“ segir hún og að borgarfulltrúar vilji að þetta verði gert eins hratt og hægt er.

„Því skólarnir eru að fara að byrja, það er það sem bíður okkar í næstu viku.“

Fjöldi foreldra barna við skólann kallaði eftir aðgerðum í vetur. Þau sinntu sjálf gangbrautarvörslu og ræddu það opinberlega að kaupa gönguljós til að koma upp á Reykjaveg.

Minnka lóð skólans óverulega

Í tillögunni kemur fram að um sé að ræða breytingu á deiliskipulagi Teigahverfis vegna Reykjavegar, Hofteigs og Kirkjuteigs. Í breytingunni sem lögð er til felst að loka fyrir umferð Kirkjuteigs annars vegar og Hofteigs hins vegar inn á Reykjaveg og að minnka óverulega lóð Laugarnesskóla til að koma fyrir snúningssvæði við enda Hofteigs.

Lóð Laugarnesskóla minnkar um 137 fermetra til að búa til snúningsstæði og fer frá því að vera 23.127 m2 í að vera 22.990 m2. Minnkun lóðarinnar er það óveruleg að hún hefur ekki áhrif á nýtingarhlutfall sem er óbreytt eða 0,28 samkvæmt tillögunni.

Þá er gert ráð fyrir kantsteini, götugögnum og gróðri við enda Hofteigs en útfærslu á að skilgreina nánar í hönnun. Í framhaldi af gangstétt meðfram sunnanverðum Hofteig er gangbraut yfir Reykjaveg en gert er ráð fyrir miðeyju á Reykjavegi þar sem gangbrautin er til að bæta öryggi á gangbrautinni.

Snúningsstæði og þrenging

Gert er ráð fyrir litlu snúningssvæði við enda Kirkjuteigs sem verður útfært þannig að nokkur núverandi langstæði beggja megin götunnar verða felld burt. Einnig er gert ráð fyrir þrengingu á Reykjavegi þar sem núverandi tenging er við Kirkjuteig og er tilgangurinn að bæta öryggi á gangbraut yfir Reykjaveg en núverandi gangbraut mun hliðrast um nokkra metra til suðurs.

Í tillögunni kemur fram að talið sé að aukið umferðarflæði við aðrar götur verði lítið og innan þolmarka þeirra gatna sem það færist á. Möguleikinn á gegnumakstri um Kirkjuteig og Hofteig hverfur, sem er talið hafa jákvæð áhrif á umferð og öryggi gangandi og hjólandi vegfarenda við Reykjaveg og við Laugarnesskóla.

Fram kemur að enn verði mögulegt að nota sleppistæði með hringakstri norðan við Laugarnesskóla fyrir börn sem er ekið til skóla. Tillögunni hefur verið vísað til samþykktar í borgarráði.

Minni- og meirihluti fagnar

Í bókun í fundargerð umhverfis- og skipulagsráðs fagna fulltrúar í meiri- og minnihluta breytingunni.

„Meirihluti Sjálfstæðisflokks, Viðreisnar og Framsóknar fagnar því að tryggja eigi öryggi gangandi vegfarenda í kringum Laugarnesskóla og Skólaþorpið og bendir á að mikilvægt sé að þessar breytingar komist til framkvæmdar sem fyrst þar sem ítrekað hafa orðið árekstrar og slys á Reykjavegi þegar nemendur í Laugarnesskóla eru að ganga eða hjóla til og frá skóla.“

Í bókun meirihlutans segir að hluti nemenda skólans sé þegar fluttur í skólaþorpið og að fleiri muni flytja á næstu mánuðum.

„… og það er gott að sjá að með þessum breytingum er verið að tengja skólaþorpið betur við Teigana. Ánægjulegt er að sjá hvernig tekið hefur verið tillit til hjólandi, en mjög margir hjólandi vegfarendur nýta þessi tvenn gatnamót sem um ræðir,“ segir að lokum.

Fulltrúar Samfylkingar í ráðinu fagna einnig breytingunni.

„Öryggi gangandi vegfarenda, og ekki síst skólabarna við Laugarnesskóla, á alltaf að vera í forgangi og mikilvægt er að tryggja greitt og öruggt aðgengi gangandi og hjólandi. Fulltrúar Samfylkingarinnar fagna því að tillagan hafi verið samþykkt.“