Bein út­sending frá Sunda­höfn: Hvað verður um á­höfn Bandero?

Skipstjóri Bandero var handtekinn seint í gærkvöld eftir að hafa ekki virt tilskipanir Landhelgisgæslunnar. Áhöfn hvalveiðiskipsins Hvals 9 hafði óskað eftir aðstoð Gæslunnar og taldi öryggi sínu ógnað. Forstjóri Landhelgisgæslunnar sagði að áhöfn Bandero hefði reynt að henda netadræsum í skrúfu hvalveiðiskipsins og þannig lagt skipverja í hættu.

Síðdegis fór lögreglan að flytja skipverja úr Bandero um borð í lögreglubifreiðar og var búið að færa þrjá í land klukkan 17. Upphaflega voru 21 um borð samkvæmt Landhelgisgæslunni og dvaldi skipstjórinn sem handtekinn var í gær þar um borð í nótt. 

Símar og myndavélar voru tekin af áhöfn í gær en Paul Watson, leiðtogi samtakanna sem gera út Bandero, hefur sagt að hann hafi ekki náð sambandi við meðlimi hennar. 

Beina útsendingu má sjá í spilaranum hér að neðan.

Forstjóri Landhelgisgæslunnar segir að þetta hafi verið gert til að draga úr hættunni á því að skipverjar gætu sett sig í samband við einhvern í landi og spillt rannsókn málsins. 

Óljóst er hve lengi skipverjar verða um borð. Landhelgisgæslan segir að áhöfn hafi veitt mótspyrnu í gær og ekki hægt á skipinu. Því hafi fulltrúar Gæslunnar og sérsveitar ríkislögreglustjóra þurft að fara um borð á meðan skipið var á fullri ferð. Þrátt fyrir þetta hafi aðgerðin gengið vel og skipverjar ekki sýnt mótstöðu eftir að þau voru komin um borð. Lögreglan á höfuðborgarsvæðinu fer með rannsókn málsins.  

Fylgst er með gangi mála í vaktinni að neðan. Þið gætuð þurft að endurhlaða síðunni ef vaktin birtist ekki strax.