Sagði nei við Love Island og vann svo silfur á Samveldisleikunum

Hin 22 ára gamla Shanahan sagði í samtali við BBC Scotland News að henni hefði verið boðið að koma fram í Love Island á síðasta ári, raunveruleikaþættinum þar sem einhleypingum er komið fyrir í glæsivillu á Spáni.

Shanahan, sem er fædd í Glasgow, hafnaði hins vegar boðinu um sólskin á Majorku og kaus þess í stað að einbeita sér að íþrótt sinni. Hún vann silfur í 200 metra baksundi á Samveldisleikunum á dögunum.

„Ég er mesti Love Island-aðdáandi í heimi, ég hef horft á allar seríurnar,“ sagði hún og hló.

„Í fyrra spurðu framleiðendurnir mig og Abbie Wood [ensk sundkona] hvort við hefðum áhuga á að vera með. Ég gat samt ekki farið, því ég þurfti að einbeita mér að sundinu, en hver veit hvað framtíðin ber í skauti sér? Þetta freistaði mín svolítið en sundið varð að ganga fyrir,“ sagði Shanahan.

Ákvörðun Shanahan skilaði hins vegar árangri í lauginni og sást hún berjast við tárin eftir að hafa tryggt sér silfrið.

Eftir að hafa fengið innblástur frá því að sjá Hannah Miley keppa á leikunum 2014 sagði Shanahan að hún vonaði að komandi kynslóðir gætu fengið svipaðan innblástur við að horfa á hana í lauginni að þessu sinni.

„Ég hef alltaf sagt að ef ég get veitt næstu kynslóð íþróttamanna innblástur, þá hef ég náð mínu markmiði,“ útskýrði hún.

„Ég veit að eftir 2014, þegar ég horfði á Hannah, fann ég fyrir innblæstri og það væri gaman að hugsa til þess að kannski eru einhverjar yngri stelpur að horfa á 200 metra baksundið í þetta sinn og kannski byrja þær í sundi út af því,“ sagði Shanahan.

Hún grínaðist með að aðalvandamálið síðastliðinn föstudag hefði verið að finna tíma til að svara öllum vinum og velunnurum sem sendu henni skilaboð til að óska henni til hamingju.

„Ég er svo þakklát fyrir stuðninginn og þar sem þetta eru leikar á heimavelli finnst mér eins og stuðningurinn hafi aukist enn meira, sem er svo gaman að upplifa,“ sagði Shanahan.