Bað um ís­lensku á Hard Rock en kvöldið endaði hjá lög­reglu

HRC Ísland ehf., rekstraraðili staðarins, er nefnt í úrskurðinum og þar er einnig vísað til einkunnarorðanna „Love all, serve all“ sem hafa fylgt Hard Rock-keðjunni frá stofnun hennar árið 1971.

Atvikið átti sér stað árið 2024 þegar konan fór á veitingastaðinn ásamt tveimur vinkonum sínum. Konan sagðist hafa búið hér á landi í um tuttugu ár en hvorki hún né vinkonur hennar tali eða skilji ensku vel. Þegar þær komust að því að þjónninn talaði ekki íslensku óskuðu þær eftir íslenskumælandi starfsmanni.

Konan lýsti því fyrir nefndinni að hópurinn hefði fljótlega upplifað sig óvelkominn. Hún sagði starfsfólk hafa sýnt þeim dónaskap, matinn ekki hafa skilað sér og drykk hafa verið hellt yfir hana. Að lokum hafi þeim verið sagt að yfirgefa staðinn og lögregla kölluð til.

Veitingastaðurinn lýsti atvikum með allt öðrum hætti. Þar kom fram að konan og vinkonur hennar hefðu verið ölvaðar, háværar og ókurteisar við starfsfólk. Þjónninn hefði ekki talað íslensku en getað tekið við pöntun á íslensku. Vaktstjóri hefði blandað sér í málið og reynt að róa hópinn.

Samkvæmt frásögn veitingastaðarins hafi deilan stigmagnast eftir að annar gestur rakst í glas á borði hópsins. Starfsfólk hafi þrifið upp, boðið nýjan drykk og reynt að leysa málið, en viðbrögð hópsins hafi orðið til þess að ákveðið var að vísa konunum út. Lögregla var kölluð til og konan var síðar handtekin fyrir utan staðinn.

Kærunefnd jafnréttismála taldi ekki sýnt fram á að konunni hefði verið mismunað vegna þjóðernisuppruna eða tungumálaerfiðleika. Í niðurstöðu nefndarinnar segir að frásögn hennar, um að henni hafi verið vísað út vegna þess að hún bað um íslenskumælandi þjón, hafi þótt nokkuð ótrúverðug.

Nefndin taldi líklegra að framkoma hópsins og samskipti hans við starfsfólk hefðu ráðið úrslitum. Hard Rock braut því ekki gegn lögum um jafna meðferð utan vinnumarkaðar.