Bláa lónið festir kaup á Arctic Adventures og stefnir á markað

Þetta kemur fram í tilkynningu en kaupin eru gerð með fyrirvara um áreiðanleikakönnun á báðum félögunum, samþykki Samkeppniseftirlitsins og samþykki hluthafafunda félaganna.

Arctic Adventures sérhæfir sig á sviði ævintýra- og afþreyingarferðaþjónustu á Íslandi og rekur meðal annars vinsæla áfangastaði á borð við Fjaðrárgljúfur, Kerið og Raufarhólshelli. Markmið stjórnenda er að úr verði öflugt ferðaþjónustufyrirtæki og „leiðandi afl í rekstri og þróun íslenskrar upplifunar- og vellíðunarferðamennsku.“

Bláa lónið hf. rekur auk samnefnds baðlóns og nærliggjandi hótel, húðvörufyrirtæki, gistirekstur við Kerlingarfjöll, í Hrauneyjum og hótel og böð við Hoffell. Þá vinnur fyrirtækið að uppbyggingu hótels í Þjórsárdal og baðstaðs við Hoffelslón í Hornafirði.

Samanlagðar tekjur félaganna voru um 34,3 milljarðar króna á árinu 2025 og samanlagður fjöldi stöðugilda um 1.120, að því er fram kemur í tilkynningu. Heildarfjöldi stöðugilda hjá Bláa lóninu er 780 og 340 hjá Arctic Adventures.

Vill staðsetja Ísland sem einn fremsta upplifunaráfangastað heims

„Það er markmið okkar að Bláa Lónið leiði áfram uppbyggingu og fjárfestingar sem staðsetja Ísland sem einn af fremstu upplifunar og vellíðunar áfangastöðum heims. Kaup á Arctic Adventures er mikilvægt skref í þá átt,“ er haft eftir Sigríði Margréti Oddsdóttur, forstjóra Bláa lónsins.

„Bláa Lónið hefur byggt upp eitt sterkasta vörumerki Íslands á alþjóðavísu og með sameiginlegum styrk félaganna skapast einstakt tækifæri til áframhaldandi vaxtar og þróunar. Við hlökkum til að taka þátt í þeirri vegferð og styrkja enn frekar stöðu Íslands sem áfangastaðar í harðri samkeppni á alþjóðlegum ferðaþjónustumarkaði,“ segir Ásgeir Baldurs, forstjóri Arctic Adventures, í tilkynningu. 

Landsbankinn og Fossar fjárfestingarbanki verða umsjónaraðilar hlutafjárútboðs Bláa lónsins hf.

Fréttin er í vinnslu.