Laus úr sjálf­heldu eftir um fimm tíma strand

Sextán farþegar voru um borð þegar báturinn strandaði en þeir voru allir fluttir til lands með öðrum bát skömmu eftir að Skúlaskeið sigldi upp á grjót rétt fyrir klukkan tíu í morgun.

Þetta staðfestir Ásgeir Erlendsson, upplýsingafulltrúi Landhelgisgæslunnar í samtali við fréttastofu.

„Það var mat skipstjórans að það væri engin hætta á ferðum, aðstæðurnar væru góðar og það væri búið að koma farþegunum yfir í annan bát. Þannig að Landhelgisgæslan kallaði út sjóbjörgunarsveitir Landsbjargar til þess að vera til taks og það var síðan bara ákveðið að bíða eftir því að það myndi flæða að til þess að losa bátinn og núna bara rétt fyrir hálfþrjú að þá losnaði báturinn og siglir núna bara undir eigin vélarafli til Reykjavíkur.“

Hann segir að svo virðist sem engar skemmdir hafi orðið á bátnum. Björgunarsveitir frá Landsbjörgu voru á svæðinu til að geta brugðist við ef það skyldi flæða inn í bátinn. Björgunarsveitir fylgja nú bátnum til lands.

Ekki liggur fyrir hvernig báturinn strandaði.

„Það er eitthvað sem þarf síðan að skoða í framhaldinu. Eins og alltaf þegar að svona gerist þá tilkynnir Landhelgisgæslan svona atvik til Rannsóknarnefndar samgönguslysa sem að mun væntanlega fara nánar yfir það í kjölfarið hvað þarna gerðist.“