Rúm­lega á­tján þúsund skiluðu ekki fram­tali

Framteljendur í álagningu voru 359.948 og fjölgaði um 5.800 á milli ára. Framteljendur með erlent ríkisfang eru tæplega fjórðungur allra í álagningu. 

Þetta kemur fram í samantekt fjármála- og efnahagsráðuneytisins á vef Stjórnarráðsins þar sem tekið er mið af tekjum einstaklinga árið 2025 og eignastöðu þeirra 31. desember 2025.

Tekjuskatts- og útsvarsstofn landsmanna hækkaði um 8,4% frá fyrra tekjuári og nam 2.653 milljörðum króna árið 2025.

Laun og hlunnindi hækkuðu um 149 milljarða króna eða 7,4%, greiðslur úr lífeyrissjóðum um 36,2 milljarða króna eða 11,8% og frá Tryggingastofnun um 24,1 milljarð króna sem samsvarar 12,3% hækkun.

Atvinnuleysisbætur hækkuðu um 20,2% á milli ára og námu útgreiðslur 30 milljörðum króna. 

18.300 einstaklingar, eða 5,1%, skiluðu ekki framtali og fengu þeir áætlaðan tekjuskattstofn upp á 112 milljarða króna að meðtöldu álagi. Það er 4,2% af tekjuskatts- og útsvarsstofni, áþekkt við árið á undan, segir í samantektinni. 

Fækkar um 1.700 manns í efsta skattþrepi 

Rúmur helmingur þeirra sem fékk álagðan tekjuskatt greiddi tekjuskatt í fyrsta þrepi eða 53,3%. Um 41,9% greiddu tekjuskatt einungis í öðru þrepinu og 4,8% í efsta þrepinu. Hópurinn sem greiddi tekjuskatt í efsta þrepi taldi ríflega 16 þúsund manns og fækkaði um 1.700 milli ára.

Einstaklingur sem var með einhvern tekjuskattsstofn á aldrinum 25 til 67 ára var að meðaltali með 791.600 krónur í mánaðartekjur. Í efra fjórðungsmarki var tekjuskattsstofn einstaklinga 973.900 krónur á mánuði og í neðra fjórðungsmarki var hann 487.300 krónur á mánuði.