Bætast í hóp sam­starfs­félaga Icelandair

Í tilkynningu segir að samstarfssamningarnir muni opna öflugar tengingar á milli leiðakerfa félaganna.

„Með samstarfssamningum um sammerkt flug opnast þægilegar tengingar á milli leiðakerfa í einni bókun, með farangur innritaðan alla leið. Viðskiptavinir Icelandair munu þannig njóta góðs af öflugu leiðakerfi WestJet um Kanada og leiðakerfi AEGEAN um Grikkland. Til dæmis á þetta við um tengiflug til Aþenu, Þessalóníki og Krítar í Grikklandi, og Calgary, Winnipeg, Edmonton og Montreal í Kanada. 

Sömuleiðis munu viðskiptavinir AEGEAN fá aðgang að betri tengingum við Ísland og viðskiptavinir WestJet munu eiga auðveldara með að ferðast til Íslands og áfram með Icelandair um öflugt leiðakerfi félagsins í Evrópu. 

Undirritun samninganna fór fram á 82. aðalfundi Alþjóðasamtaka flugfélaga (IATA) í Ríó de Janeiro um helgina,“ segir í tilkynningunni. 

Haft er eftir Boga Nils Bogasyni, forstjóra Icelandair, að félagið leggi ríka áherslu á að gera ferðalög einföld og þægileg fyrir viðskiptavini. 

„WestJet og AEGEAN eru sterk félög á sínum heimamörkuðum og með samningunum opnast víðtækar tengingar fyrir viðskiptavini okkar og þeirra. Við höfum markvisst verið að fjölga samstarfsflugfélögum í gegnum árin en samningar sem þessir styrkja stoðir félagsins, skapa enn fjölbreyttari ferðamögueika fyrir viðskiptavini okkar og stuðla að mikilvægum tengingum Íslands við umheiminn,“ er haft eftir Boga Nils.