Saka stjórn­völd um að tefja endur­reisn Grinda­víkur

Í tilkynningu sem bæjarstjórnin sendi frá sér í morgun segir að bæjarstjórn hafi fundað með stjórn og framkvæmdastjóra Þórkötlu á miðvikudaginn. Farið hafi verið yfir stöðu húsnæðismála, fasteignakaup og framtíðaráform félagsins í bænum.

„Þótt fundurinn hafi verið um margt gagnlegur, staðfesti hann þann rökstudda grun bæjaryfirvalda að það er ekki Fasteignafélagið Þórkatla sem stendur í vegi fyrir lausnum fyrir Grindvíkinga, heldur stjórnvöld. Á fundinum kom skýrt fram af hálfu fulltrúa Þórkötlu að félagið sé nánast að fullu í eigu ríkisins og þurfi að lúta vilja eiganda síns þegar kemur að stórum ákvörðunum um endurkaup og búsetu. Það er vitað að fasteignafélagið hafði fyrir nokkru unnið að útfærslum á endurkaupum og lausnum fyrir íbúa og var ekkert því til fyrirstöðu strax í mars að kynna þær útfærslur,“ segir í tilkynningunni.

Stjórnvöld hafi hins vegar staðið í vegi fyrir því. í stað þess að greiða götu þeirra sem vilja og geta snúið heim, sé þrengt enn frekar að íbúum.

Frá og með 1. september verður heimild fyrrverandi eigenda fasteigna í Grindavík til dvalar í bænum takmörkuð við tólf nætur á mánuði. Bæjarstjórn segir þetta munu hafa verulega neikvæð áhrif á samfélagið, viðhald eigna og lífið í bænum. Dvalarsamningarnir hafi verið mörgum líflína og mikilvægt skref til að máta sig við aðstæður í heimabænum á meðan beðið var eftir endurkaupasamningum.

„Bæjarstjórn lýsir yfir miklum vonbrigðum með þá neikvæðu og fjandsamlegu afstöðu sem stjórnvöld sýna gagnvart skjótri enduruppbyggingu bæjarfélagsins. Stjórnvöld hafa skýlt sér á bak við áhættumat sem unnið hefur verið án aðkomu eða samráðs við sveitarfélagið og tekur lítið sem ekkert tillit til þeirra miklu mótvægisaðgerða sem þegar hefur verið ráðist í af hálfu bæjarins.“

„Ný bæjarstjórn Grindavíkur krefst þess að ríkisstjórnin stígi fram úr skugga Þórkötlu og tali skýrt við heimamenn. Grindavíkurbær er tilbúinn til samstarfs um raunhæfar lausnir og krefst þess að heimkoma þeirra Grindvíkinga sem hennar óska, verði ekki tafin að óþörfu.“