Lætur hnefana tala

Kolbeinn mætir Pavel Sour í Kaupmannahöfn í kvöld á viðburðinum Big Boys Boxing Gala. Bein útsending frá viðburðinum hefst klukkan 17:00 á Sýn Sport.

Frægt er að Kolbeinn átti að taka þátt í fyrsta atvinnumannabardaga sögunnar hér á landi í Gamla bíó í síðasta mánuði en hætta þurfti við þann viðburð sökum meiðsla hans.

Hann er nú búinn að jafna sig og er klár í slaginn.

„Þetta var auðvitað helvítis skellur, alltaf leiðinlegt að lenda í meiðslum. En við tókum bara endurhæfingu, gerðum allt rétt og allt sem við áttum að gera. Ég er góður og það er bara næsta verkefni,“ segir Kolbeinn.

Venju samkvæmt fór vigtun fram í gær þar sem hefð er fyrir því að hnefaleikakapparnir rífi kjaft hvor við annan. Kolbeinn stundar þá iðju þó lítið.

„Ég er ekki mikið að gera það. Maður lætur bara höggin og hendurnar tala.“

Markmiðið að rota Tékkann snemma

Andstæðingur Kolbeins er Tékki að nafni Pavel Sour sem er meðal reynslumeiri kappa álfunnar. Sá er 43 ára gamall og hefur tekið þátt í 52 bardögum á löngum ferli, unnið 21 en tapað 31.

„Hann er mjög reyndir og hefur boxað við marga toppboxara. Hann er hávaxinn, svipað hár og ég. Hann er með gott double jab og er tricky. Það verður skemmtilegt verkefni að kljást við,“

Á að rota manninn?

„Það eru alltaf afköst af ágóðanum. Ég er alltaf með checklista sem ég er að fara að gera í hausnum á mér, að vinna jabbið og búa til opnanir. Ef allt gengur vel ætti ég að rota hann tiltölulega snemma.“

Þannig að það á ekkert að tvínóna við hlutina og klára þetta bara snemma?

„Já, bara um leið og færi opnast er þetta game over,“ segir Kolbeinn kokhraustur.

Kolbeinn mætir Pavel Sour í Kaupmannahöfn í kvöld á viðburðinum Big Boys Boxing Gala. Bein útsending frá viðburðinum hefst klukkan 17:00 á Sýn Sport.