Carlsen í neðsta sæti í Noregi

Carlsen er efstur á heimslistanum og sigurstranglegastur á öllum mótum sem hann mætir á en alveg sérstaklega á heimavelli í Noregi. Hann hefur unnið Norway Chess mótið sjö sinnum af þrettán skiptum sem það hefur verið haldið.

Annað er uppi á taflborðinu þetta árið því Carslen er í neðsta sæti af sex keppendum eftir þrjár umferðir.

Í fyrstu umferð tapaði Carlsen gegn meiddum Alireza Firouzja, sem mætti fótbrotinn í hjólastól en rúllaði ríkjandi meistaranum upp.

Í annarri umferð varð jafntefli niðurstaðan gegn stórmeistaranum Vincent Keymer og í þriðju umferð þurfti Carlsen að sætta sig við annað tap gegn stórmeistaranum R. Praggnanandhaa.

Tap Carlsen í þriðju umferð var mjög sannfærandi að mati World Chess sem fjallar um mótið.

Praggnanandhaa var við stjórnvölinn frá upphafi í löngum leik en Carlsen átti ágætis áhlaup þegar tíminn fór að verða naumur. Þá gerði meistarinn mistök sem kostuðu sigurinn.

„Ég missti af einu atriði, panikkaði og tapaði fljótlega,“ sagði Carlsen. 

Fjórða umferð mótsins hefst klukkan 16:00 en skoða má skákirnar á Chess.com.