Sjálf­stæðis­flokkur býður Gylfa Þór upp í dans í Mosó

Í fréttatilkynningu þess efnis segir að Sjálfstæðisflokkurinn hafi hlotið fimm bæjarfulltrúa í kosningunum og sé stærsti flokkurinn í bæjarstjórn. Viðreisn hafi fengið einn fulltrúa kjörinn. Saman gætu flokkarnir myndað meirihluta með sex fulltrúa af ellefu í bæjarstjórn Mosfellsbæjar. D-listi Sjálfstæðisflokks hafi fengið 2.949 atkvæði og C-listi Viðreisnar 708 atkvæði.

„Við erum þakklát fyrir það sterka umboð sem Sjálfstæðisflokkurinn fékk í kosningunum og tökum þeirri ábyrgð af auðmýkt. Okkar markmið er að mynda traustan og málefnalegan meirihluta sem getur hafist handa við að vinna að þeim verkefnum sem fram undan eru í bænum,“ er haft eftir Hilmari Gunnarssyni, oddvita Sjálfstæðisflokksins í Mosfellsbæ.

Í kosningunum fengu sex framboðslistar fulltrúa kjörna í bæjarstjórn Mosfellsbæjar. Sjálfstæðisflokkurinn fékk fimm fulltrúa, Framsóknarflokkurinn tvo og Viðreisn, Vinir Mosfellsbæjar, Miðflokkurinn og Samfylking einn fulltrúa hver.