„Við erum bara svo miklir hundar“

„Við erum bara svo miklir hundar. Baldur teiknaði þetta bara upp í hálfleik og sagði okkur hvað þyrfti að gera og við bara náðum okkur á strik eftir það,“ sagði Viktor, eftir leik í viðtali við Sýn Sport.

„Pablo nær lélegu skoti og þú einhvernveginn rífur þetta niður og treður,“ segir Andri Már Eggertsson í viðtali við Viktor eftir leik. Viktor vildi þá meina að þetta hafi alla tíð verið sending. En hér að neðan má sjá troðsluna.

„Þetta var ekki skot hjá Pablo þetta var sending. Við vorum búnir að plana þetta, þú sérð hvernig hann leggur þetta beint upp fyrir mig.“

Viktor hefur komið vel inn í lið Stjörnunar í kjölfar meiðsla lykilleikmanna en hann er uppalinn í Stjörnunni. Aðspurður hvernig það var að upplifa það að stúkan tryllist í kjölfar troðslunnar.

„Þetta er heimavöllurinn minn og ég þarf að skila mínu. Þetta er bara geggjað, þetta eru allt vinir mínir og félagar og þetta er bara draumur að rætast.“

Strákarnir í Bónus Körfuboltakvöldi ræddu þá aðeins um Viktor og hvernig hann hefur komið inn í lið Stjörnunar.

„Ótrúlega gaman að sjá hann stíga upp í þetta hlutverk. Ég get sagt frá því að mánaðarmótin janúar febrúar, tveimur tímum fyrir gluggalok var ég með hann í símanum að reyna fá hann í Njarðvík útaf því að Dominykas Milka var meiddur. Hann var bara nokkuð nálægt því í alvöru, hann þurfti að hringja í Baldur tvisvar en á endanum þá ákvað hann að vera hér,“ sagði Rúnar Ingi Erlingsson, þjálfari Njarðvíkur.

„Hvernig líður þér með það að þú hefðir getað mögulega eyðilagt þetta fyrir honum“, svaraði þá Jón Halldór Eðvaldsson.

„Hann væri á Tene núna ef hann hefði farið í Njarðvík,“ bætti Stefán Árni Pálsson þá við.

Njarðvík er auðvitað komnir í sumarfrí og því ljóst að hlutverkið sem Viktor er í núna er heldur meira spennandi og líklegast rétt ákvörðun hjá Viktori að vera um kyrrt.