Dómaraskandall og augn­pot: Hrafn getur bundið enda á ára­langa bar­áttu sína gegn Bean

Segja mætti að Hrafn og Will Bean eigi sér langa sögu í bar­daga­búrinu þar sem þeir hafa mæst í tví­gang áður. Báðir bar­dagar þeirra hafa til þessa hafa endað með no con­test úr­skurði, það er engum sigur­vegara. Þeim fyrri þó eftir að Hrafn hafði verið lýstur sigur­vegari og fengið meistara­belti utan um sig. 

Ljóst er að mikil eftir­vænting verður fyrir þessum þriðja bar­daga Hrafns og Will Bean þar sem að baráttan milli þeirra verður endan­lega út­kljáð.

Vísir fjallaði um mjög svo skringi­lega at­burðarás í fyrsta bar­daga þeirra á sínum tíma, sann­kallaðan dómaraskandal þar sem Hrafn var sviptur meistara­belti eftir skraut­legan sigur.

Hrafn og Bean mættust þar í titil­bar­daga í Donca­ster á vegum Ca­ged Steel þar sem að víta­vert klúður tíma­varðar gerði allt vit­laust og kvartanir Bean eftir að Hrafn hafði verið lýstur sigur­vegari bar­dagans, skiluðu no con­test dómi. Það er að hvorki Bean né Hrafn hefðu unnið bar­dagann.

Kapparnir mættust svo aftur í lok ársins 2023 í bar­daga sem var stöðvaður í annarri lotu eftir að Bean hafði potað í auga Hrafns sem gat ekki haldið keppni áfram í kjölfarið.

Þrí­leikurinn verður full­komnaður á Gla­cier Fig­ht Night 3 bar­daga­kvöldinu laugar­daginn 3.október næst­komandi í Framheimilinu í Úlfarsárdal þar sem að Glacier Fight Night fór fram fyrir fullu húsi og í mikilli stemningu.

Ekki hefur verið opnað fyrir forsölu en hægt er að skrá sig á póstlista til þess að fá upplýsingar um forsölu þegar dregur nær bardagakvöldinu. 

Þetta verður fyrsti bardagi Hrafns frá því að hann og Bean mættust í búrinu í seinna skiptið hingað til í desember árið 2023. Bean hefur aftur á móti barist einu sinni síðan þá, Bretinn laut þar í lægra haldið gegn samlanda sínum Laurence Charnock.