„GusGus gera sexý lög og Birnir er ein­fald­lega sexý beast“

GusGus segir lagið hluta af áframhaldandi vegferð sveitarinnar þar sem hún hefur, allt frá útgáfu Mobile Home, leitað leiða til að „draga fram anda níunda áratugarins í nýju samhengi, að staðsetja reifið í einhvers konar hliðarveruleika, þar sem fortíð og framtíð mætast í sama takti.“

„Tónlistin sem þar verður til er erfitt að skilgreina með hefðbundnum hætti. Kannski mætti kalla hana nostalgíska framtíðartónlist; hljóðheim sem sækir í fortíðina en horfir samt óhikað fram á við,“ segir Biggi Veira í GusGus.

Lagið sé meira en bara lagasmíð að mati sveitarinnar því í heimi sem virðist sífellt óstöðugri sé mikilvægara en nokkru sinni að rækta reifið: „rými þar sem fólk kemur saman, sleppir tökunum og finnur sameiginlegan takt.“ Lagið má hlusta á hér að neðan:

„Kannski er það einmitt einn heilbrigðasti staðurinn sem eftir er á þessari jarðkringlu; eins konar samningavettvangur fyrir bjartari framtíð,“ bætir Biggi Veira við. GusGus heldur áfram þeirri stefnu, næst með stórtónleikum í Laugardalshöll þann 30. maí næstkomandi.

Af hverju fenguð þið Birni til liðs við ykku?

„Svarið er einfalt: GusGus gera sexý lög og Birnir er einfaldlega sexý beast. Hann er vinur sveitarinnar og okkur þykir afar vænt um hann, svo það lá beinast við að fá hann með í lagið,“ segir Biggi.

„Í laginu mætast systkini í sérstökum hljóðheimi. Á vissan hátt snýst lagið um systkinasamband þeirra, en það er jafnframt speglað inn í einhvern framtíðarheim, þar sem tilfinningar, tengsl og fjarlægðir fá nýja merkingu,“ bætir hann við.