Brynja og Svíinn fögnuðu eftir magnað kvöld í Sjallanum

Flestir bestu pílukastarar landsins voru með og goðsagnirnar John McDonald og Russ Bray á svæðinu líkt og í fyrra. Magni Ásgeirsson sá einnig til þess að gleðin væri við völd og að fólk léti vel í sér heyra.

Mótið er á vegum píludeildar Þórs og mátti sjá það í beinu streymi gegnum Youtube.

Eftir riðlakeppnina í gær stóðu átta keppendur eftir í karlaflokki og tveir í kvennaflokki, og voru þetta fyrstu leikir kvöldsins:

Í karlaflokki - 8 manna úrslit:

• Alexander Veigar – Halli Egils
• Björn Leon – Halli Birgis
• Matthías Örn – Jón Ragnar
• Vitor Charrua – Viðar Valdimarsson

Í kvennaflokki - úrslitaleikur:

• Brynja Herborg – Hrefna Gerður

Svo fór að Brynja fagnaði 4-2 sigri í hörku úrslitaleik gegn Hrefnu sem var aðeins nokkrum millímetrum frá því að knýja fram oddalegg.

Karlamegin var það Svíinn Björn Lejon sem vann, eins og veðbankar höfðu spáð, og var sigurinn sérstaklega sætur fyrir hann eftir að hafa fallið út í 8-manna úrslitum gegn Matthíasi Erni Friðrikssyni á mótinu í fyrra.

Lejon sló Halla Birgis út í 8-manna úrslitunum og hafði svo betur gegn meistaranum frá því í fyrra, Alexander Veigari Þorvaldssyni, í undanúrslitum.

Í úrslitaleiknum mætti Lejon Vitori Charrua og vann hann nokkuð örugglega, 5-2.