Wilder skoraði á Joshua: „Hann er hræddur“

Joshua var í O2-höllinni í Lundúnum í gær og fylgdist með bardaganum en þeir Chisora eru miklir vinir.

Joshua lenti í bílslysi í Nígeríu undir lok síðasta árs þar sem tveir vinir hans létust. Hann hefur ekkert keppt síðan þá en í síðasta bardaga sínum, 19. desember í fyrra, sigraði Joshua samfélagsmiðlastjörnuna Jake Paul.

Mikið hefur verið rætt og ritað um möguleikann á bardaga milli Joshuas og Tysons Fury en Wilder er meira en klár í að takast á við Joshua.

„Gerum þetta,“ sagði Wilder er hann hitti Joshua eftir bardagann í gær. „Hann er hræddur,“ bætti bandaríski boxarinn við.

Kallið mig Herra Hreinan

Í viðtölum eftir bardagann staðfesti Wilder að hann hefði skorað á Joshua.

„Þetta voru ekki nokkur orð. Ég klesst'ann og sagði: Gerum þetta,“ sagði Wilder.

„Ég er tilbúinn fyrir alla svo lengi sem þessir gaurar eru í þungavigtinni. Þú getur kallað mig Herra Hreinan því ég vil hreinsa alla deildina upp. Þungavigtin er ekkert án Deontay Wilder.“

Tveir dómarar dæmdu Wilder sigur í bardaga gærdagsins en einn taldi Chisora hafa haft betur.

Hinn fertugi Wilder hefur unnið 45 af fimmtíu bardögum sínum, þar af 43 með rothöggi. Hann var ósigraður í 43 fyrstu bardögum sínum, allt þar til hann tapaði fyrir Fury í febrúar 2020.

Wilder og Fury mættust í þrígang á þriggja ára tímabili. Fury vann tvo bardaga og einu sinni varð jafntefli.