Sam­fella í verki - Fram­tíðar­sýn Okkar Hvera­gerðis

Í gær, á 8 ára afmælisdegi bæjarmálafélagsins Okkar Hveragerðis, kynntum við með stolti framboðslista Okkar Hveragerðis fyrir komandi bæjarstjórnarkosningar. Það eru mikil gleðitíðindi að staðfesta að Pétur G. Markan er bæjarstjóraefni listans. Með því því viljum við tryggja áframhaldandi fagmennsku og samvinnu um þau mikilvægu verkefni sem hann hefur leitt í samstarfi við kjörna fulltrúa í þágu allra bæjarbúa.

Stjórnun bæjarfélags er liðsvinna. Á síðustu árum höfum við náð árangri sem sést og finnst í daglegu lífi bæjarbúa. Með öguðum rekstri og markvissri fjölgun tekjustofna var neikvæðum 356 milljóna króna rekstri A og B hluta frá árinu 2021 snúið í 168 milljóna króna hagnað árið 2024.

Þessi 524 milljóna króna viðsnúningur byggir á hugrakkri sókn þar sem vöxtur bæjarins hefur verið nýttur til að styrkja sameiginlega sjóði, m.a. með stórum samningum eins og um uppbyggingu á Árhólmasvæðinu. Sú fjárfesting mun skila bænum hátt í milljarði króna. Með því að stækka tekjugrunninn án þess að íþyngja íbúum hefur skapast svigrúm fyrir umfangsmikla bætingu á þjónustu við bæjarbúa á öllum aldri:

• Fjölskyldan í fyrirrúmi: Öllum börnum frá 12 mánaða aldri hefur verið tryggt leikskólapláss, leikskólagjöld lækkuð um 70%, gjaldfrjálsar skólamáltíðir innleiddar og frístundastyrkurinn tvöfaldaður.
• Framkvæmdir: Nýjar viðbyggingar við Óskaland og grunnskólann hafa verið teknar í notkun, nýr gervigrasvöllur opnar nú á vormánuðum og nýtt íþróttahús rís af krafti ásamt því að gatnagerð mikilvægra stofnbrauta og nýrra hverfa er í fullum gangi.
• Virðing fyrir eldri kynslóðinni: Ný og öflug stefna hefur verið sett í málefnum eldri borgara og með verkefninu „Gott að eldast“ og nýjum þjónustusamningum hefur aðstaða og öryggi eldri borgara styrkst til muna. Jafnframt hefur verið stofnaður undirbúningshópur sem mun skila forsendum fyrir glæsilegum nýjum þjónustukjarna til eflingar þjónustu við eldri íbúa.

Þetta er aðeins hluti þeim fjölmörgu verkefnum sem unnist hafa á kjörtímabilinu. Á okkarhveragerdi.is má finna nánari upplýsingar um margvísleg verkefni kjörtímabilsins og framtíðarstefnu okkar fyrir Hveragerðisbæ.

Það eru spennandi tímar í Hveragerði, bæjarfélagi í örum vexti. Stærsta áskorunin framundan er að tryggja að innviðirnir haldi í við fjölgun íbúa án þess að fórna skynsamlegum rekstri. Þá skiptir dýrmæt reynsla og fagmennska kjörinna fulltrúa miklu máli sem og áframhaldandi samvinna við bæjarstjórann Pétur G. Markan. Við ætlum að halda áfram að sækja þau tækifæri sem við búum að hér í Hveragerði og verja hagsmuni bæjarins af festu - hvort sem það er gagnvart virkjanaáformum í Ölfusdal eða í þrýstingi á ríkið vegna samgöngumála og hjúkrunarrýma.

Við bjóðum fram krafta okkar til að halda vegferðinni áfram. Við ætlum að halda áfram að byggja á öflugum grunni, klára mikilvæg verkefni og sækja ný tækifæri af krafti. Gerum þetta saman fyrir Hveragerði!

Frambjóðendur í 1.–4. sæti Okkar Hveragerðis.