Stjórnendur svartsýnni en þeir hafa verið frá 2020

Samúel Karl Ólason skrifar 18. mars 2026 09:34

Stjórnendur iðnfyrirtækja telja margir að störfum muni fækka á næstu mánuðum og draga muni úr fjárfestingu. Vísir/Vilhelm

Fleiri stjórnendur iðnfyrirtækja telja að aðstæður í efnahagslífinu séu slæmar fyrir þeirra fyrirtæki en þeir sem telja aðstæðurnar góðar. Munurinn er töluverður og hefur orðið alger viðsnúningur þar á frá því fyrir ári síðan. Stjórnendur vænta samdráttar í fjárfestingum og þykja svör þeirra í nýrri könnun benda til stöðnunar í fjárfestingum.

Þetta er meðal þess sem kemur fram í niðurstöðum nýrrar könnunar Samtaka iðnaðarins en þar segir að það hafi ekki gerst frá árinu 2020 að fleiri svarendur telji aðstæður í efnahagslífinu slæmar en telji þær góðar.

Nú meti stjórnendur iðnfyrirtækja aðstæður almennt verri en þær hafa gert frá 2020 og er hlutfall þeirra sem meta aðstæður slæmar það hæsta frá því ári.

Alls svöruðu 36 prósent svarenda í könnuninni á þann veg að aðstæður í efnahagslífinu á Íslandi væru slæmar fyrir þeirra fyrir tæki. Fyrir ári síðan var hlutfallið sautján prósent.

Rúmur fjórðungur svarenda, eða 26 prósent, sögðu aðstæður góðar en fyrir ári síðan var það hlutfall 54 prósent. 38 prósent svarenda sögðu aðstæður hvorki góðar né slæmar.

Fjöldi þeirra stjórnenda sem telja aðstæður fyrir iðnfyrirtæki þeirra hafa versnað hefur aukist töluvert milli ára.

Í könnun SI kom einnig í ljós að fleiri stjórnendur telja að aðstæður muni versna á næstu sex til tólf mánuðum en telja að þær muni verða betri. 36 prósent sögðust telja að þær myndu versna, sem er sama hlutfall og taldi aðstæður vera slæmar, en einungis fimmtán prósent svarenda sögðust telja að aðstæður myndu verða betri.

Fyrir ári síðan töldu tólf prósent svarenda að aðstæður myndu versna og 39 prósent að þær myndu verða betri.

Mikil breyting hefur orðið á viðhorfi stjórnenda iðnfyrirtækja varðandi hvernig þeir telja að aðstæður muni breytast á næstu mánuðum.

Telja að störfum muni fækka

Í könnuninni voru stjórnendur einnig spurðir hvort þeir teldu að þróun fjölda starfsmanna í þeirra fyrirtækjum yrði á næstu tólf mánuðum. Í fyrsta sinn frá 2020 sögðust fleiri stjórnendur telja að starfsmönnum muni fækka en fjölga.

Alls sögðu 23 prósent svarenda að störfum myndi fækka og tuttugu prósent sögðu að þeim myndi fjölga. Eins og í öðrum svörum í könnuninni er um töluverðan viðsnúning að ræða frá síðasta ári. Þá töldu þrettán prósent að störfum myndi fækka og 28 prósent að störfum myndi fjölga.

Efnahagsmál Vinnumarkaður

Mest lesið

Fleiri fréttir