Sonur Khamenei nýr leið­togi Írans

Þessu var greint frá í tilkynningu á írönskum ríkismiðlum rétt í þessu. Fregnir höfðu borist af því á undanförnum dögum að Mojtaba myndi taka við af föður sínum en Ísraelar hafa lýst því yfir að þeir muni eltast við hvern sem verður lýstur arftaki Khamenei.

Faðir hans hafði verið æðsti valdhafi landsins í rúm þrjátíu og sjö ár þegar hann lést í vistarverum sínum í Teheran á fyrsta degi stríðsins. Mojtaba var ekki á staðnum þegar sprengjurnar féllu en móðir hans, eiginkona og dóttir létust í sprengingunni.

Mojtaba hefur áratugalöng tengsl við íranska byltingarvörðinn en hann gegndi herþjónustu í Habib-herdeildinni í stríði Írans og Íraks á níunda áratugnum. Tími hans í byltingarverðinum hjálpaði honum að mynda áhrifamikil tengsl við menn sem nú gegna háttsettum stöðum í landinu.

Því telja margir að hann hafi myndað mikilvæg sambönd innan stjórnkerfis byltingarvarðarins. Í mörg ár hefur hann verið lykiltengiliður milli föður síns og forystu varðliðsins. Það veitir honum einstaka stöðu. Hann er náinn öryggiskjarnanum en einnig tengdur borgaralegri og klerkalegri forystu sem treystir á hann.

Ólíkt föður sínum, sem var vel þekktur menntamaður, fræðimaður í persneskum kveðskap og áhrifamikill ræðumaður með fylgi innan Írans áður en hann varð æðsti leiðtogi, hefur Mojtaba Khamenei ekki skapað sér slíkan orðstír. 

Í nýlegri greiningu íranska útlagamiðilsins Iran International segir að leiðtogar íranska byltingarvarðarins hafi þrýst mjög á klerkaráðið svo þeir völdu Mojtaba. Aðrir miðlar erlendis hafa sagt svipaðar fréttir á undanförnum dögum.

Samkvæmt írönskum miðlum eru leiðtogar hersins og byltingarvarðarins búnir að lýsa yfir hollustu við Mojtaba. Hann verður sá þriðji til að sitja í embætti æðstaklerks.

Fréttin hefur verið uppfærð.