KA upp um tvö sæti með al­gjörum risasigri

KA vann leikinn í kvöld 38-21 og kom sér þannig upp í 4. sæti Olís-deildar karla í handbolta. Liðið er nú stigi fyrir ofan ÍBV sem og Aftureldingu sem tapaði í gær.

KA er því með heimavallarrétt sem stendur, nú þegar tvær umferðir eru eftir fram að úrslitakeppninni. Stjarnan er hins vegar næstneðst með 10 stig, stigi á eftir Selfossi og Þór.

Það var aldrei spurning hvernig færi í kvöld en KA var níu mörkum yfir í hálfleik, 20-11. Gestirnir héldu svo áfram að bæta við forskotið í seinni hálfleiknum.

Einar Rafn Eiðsson var markahæstur KA með átta mörk úr jafnmörgum skotum, þar af fjögur af vítalínunni, og þeir Giorgi Dikhaminjia og Dagur Gautason skoruðu sjö mörk hvor. Markverðir KA voru einnig frábærir en Ágúst Elí Björgvinsson varði 13 af 30 skotum sem hann fékk á sig og Bruno Bernat varði 5 af 9.

Hjá Stjörnunni var Benedikt Marinó Herdísarson markahæstur með sjö mörk og Ísak Logi Einarsson skoraði fimm.